وبعدين بقى؟؟؟؟

وبعدين بقى؟؟؟؟
اللي اعرفه ان دوام الحال محال
امال معايا ايه جرى من يوم ما حالي مال
لا بيتعدل ولا بيتظبط على طول بشكل هلال
ماترجع بدر زي ما كنت في الاول
ولا ده صعب وعليك استحال

للمره الالف

للمره الالف بأقول لأ
ومش فاهمه باقولها بحق
ولا عشان مجرد رفض
عشان يبقالي يوم موقف
يتقال فيه ده قال يوم لأ
مش زي باقي الخلق
ساكتين بحق وبغير حق
علمتها لنفسي من صغري
عشان احس يوم بالفرق

افكار

افكار كتير بتدور في راسي و منين الاقيها
دماغي زي الملاهي ومفيش آمل فيها
أرسى هنا ولا هنا يا دماغي على الربكه
ولما ابص في طريقي باقول يا توهتي في السكه
لا عارفه باديه منين ولا فين راح انهيها
وبعدين بقى يا دماغي ماتروّقي حبه
دوختيني معاكي وتعبت من السكه
سكتي طويله دليني ازاي اعديها
وازاي ياعقلي الداير اوصل لاخرتها

دربي في اخره نوور

اموات لكن احياء
والضلمه حواليا
دربي في اخره نوور
وبعيد على عينيه
محبوسين جوانا قبل ما اللي حوالينا يقيدونا
في كل حاجه حتى بلدنا مبقتش بلدنا اللي بتحضنا
مبقتش باعرفها
هي دي مصر......
بلدي اللي بحبها وبموت فدا ترابها ويغلي دمّي
لو حد جاب سيرتها!!
واقوله اخرس...دي مصر
عارف يعني ايه مصر؟؟؟؟؟؟؟؟
البلد اللي دارت عليها الوان الظلم والاستعمار
ولسه لابسه توبها وماده في الارض جذورها
محدش قدر يزحزحها من مكانها
سنين وايام تعدي ومصر تدوم والغاصب يروح
ده اللي اعرفه عن بلدي اللي انا عشت فيها واعرفها
بلدي الدفا اللي باحس بيه في احضان شوارعها
وانا ماشيه بين مبانيها ومساجدها وكنايسها
الحسين والغوريه والقاهره الفاطميه
ربنا كرّم بلدنا اوي واصطفاها بأل البيت
وجعل مثواهم الاخير فيها
مصر جميله اوي طب ليه بنجرحها؟......
ازاي نعيش فيها ونخاف من اللي جاي ونخاف حتى من صوتنا لاحسن يجرحها
تفتكروا دي بلدي اللي طول عمري بتباهى بيها
وافتخر واقول مصريتي اغلى ما املك في الدنيا وما فيها
ولا الزمن غيرها وخرب ملامحها
محتاره و قلبي مش مطاوعني مش عارفه اكره ايه
مصر ولا اللي بيجرى فيها

يااااااااارب مصر دي جنتك في الارض يارب احرسها من كل شر او شيء يدنسها

بهيه

بهيه هي بهيه
بالاسم والمعنى
نورها ملا الدنيا
وضيّها يلالّي
في قلبي هواها مليان
وفي عينيها ترحالي
لما اسمع ندّاها
البّي الندا واغرق في احزاني
ازاي باموت فيها
وفي وجودي بتعاني
امال هوايا فين
وهي غرقانه
دموعها ماليه العين
ويا قلبي آآآآآآآآآآه يانا
نفسي احميكي
وجوايا اخبيكي
من عيون العدا
والطمعانين فيكي
لاجلك اعدي بحور
لاجل اداويكي
بلدي وهواها وسام على صدري
ده حبها زي القدر مكتوب على جبيني
ومن قلبي بادعيلها
يارب ابعد عنها شر المفسدين فيها
ده هي ام البلاد ومفيش بديل ليها

فكره

تعمل ايه لو خطرت على بالك فكره مجنونه مقتنع بيها جدا بس مستحيله في نفس الوقت زي مثلا انك نفسك تتسلق اعلى جبل في العالم وتنط من فوقيه او تسبح في الجو وسط السحاب في السماء الواسعه
جربت احساس انك تصحي من النوم فجاه وتخطر على بالك فكره تنفذها خروجه مجنونه او اقتراح خرافي ومتديش نفسك فرصه تناقشه مع نفسك عشان متغيرش رأيك
ساعات كتير الواحد بيبقى محتاج انه ياخد قرارت من غير تفكير عشان ميعقدش الدنيا قدامه ويحس ان الدنيا ابسط من كل التعقيدات دي
والاروع انه يتصالح مع نفسه ويفهمها كويس ويعرف امتى يعمل كده وامتى يسيب نفسه على حريتها
وياريت نقدر..........

فعلا غريب

سؤال مهم ليه احنا ممكن نتخلي عن ناس ليهم اثر كبير في حياتنا ونقول علشان بنحبهم او عشان مصلحتهم
انا اللي افهمه ان لما حد يحب حد لازم يكون معاه في كل احواله سواء كانت فوق او تحت يبقى ازاي خطوه التخلي عن الناس اللي بنقول اننا بنحبهم دي بنقدر عليهما
ولو قدرنا فعلا نبعد عنهم يبقى احنا بجد كنا بنحبهم؟؟؟؟؟
ولا ساعات الحب يبيقى عنده قدره غريبه يخلينا نعكس بالصفات وعكسها الرقه والقسوه والاستقرار والضياع كل الحاجات ونقيضها غريب الحب فعلا لما بيغير معاني كتير جوانا وبيقلب المفاهيم ويخلي كل واحد مننا قاموس لوحده بيترجم حبه على هواه من غير تمييز فعلا غريب!!!!!